பத்திரிகை உலகின் பேரொளி அணைந்தது!
மனிதநேய சிகரமான பண்பின் வேந்தர் சிவந்தி ஆதித்தனார் மறைந்தார்!
வைகோ உருக்கம்
“தமிழர் வரலாற்றின் புகழ்மிக்க அங்கமான தினத்தந்தி ஏட்டின் அதிபர் ஐயா சிவந்தி ஆதித்தனார் மறைந்தார்” என்ற செய்தி ஈட்டியாய் என் இதயத்தில் பாய்ந்தது. என் செவிகளையே என்னால் நம்ப முடியவில்லை!
எழில் சிந்தும் புன்னகையுடன் அனைவரையும் காந்தமெனக் கவர்ந்த உத்தமராம் ஐயா சிவந்தி ஆதித்தனார், தமிழர் தந்தை ஐயா ஆதித்தனார் தொடங்கிய தினத்தந்தி ஏட்டை, தமிழ் கூறும் நல் உலகத்தின் காப்பரணாகவும், கலங்கரை விளக்கமாகவும் நடத்தி வந்தார்.வலது கை கொடுப்பது இடது கை அறியாத கொடை உள்ளத்தால் பல்லாயிரக் கணக்கான குடும்பங்களை வாழ வைத்தார். விளையாட்டுத் துறையில் இந்தியாவின் கைப்பந்தாட்டத்தை உலகளாவிய தகுதிக்கு தன்னுடைய முயற்சியாலும், சொந்த பொருட்செலவினாலும் உயர்த்திய உத்தமர் ஆவார்.
